2Ti 3 | ASO | STEP | Ne neiha naza ma lo-gemeloze. Gele minezo. Alinge' gamenela nene lihitehe' inite' soto' o-ledeline' gamene gehepeve soto' oloseive.

2 Timothy 3

Alinge' Gameneu' Monovo Goloso Ato Ato' Soto' Ogo Naba Ogo Buu Lilingumu' Paulo' Timoteo'ni Lo-imine' Gamazi

1 Ne neiha naza ma lo-gemeloze. Gele minezo. Alinge' gamenela nene lihitehe' inite' soto' o-ledeline' gamene gehepeve soto' oloseive. 2 A'mine noluvoni' nene ado' evene' engikumukovo' gilaa' ido' monimukovo' gilaa' ido' engi' igi mili iliza nitekumu' oko'ine di naba igi laa' ido' engikumu' gilavo dizaa', evene' dovo ledevo' o-ngedaa', ize'ningi me'ningi gamazi gili hulaa', inite' lamine' i-ngidavemu' gilavo haza nite' lolo' oga', mono' lu'ningu' nomine' minaa', 3 ido' engi' zuhomukisi ngumo helesa'mivo minaa', evene' mamu' lihime di minaa', ngemenga laa', oko'nine lu'nido' gizebo ami gopo minaa', ize gulo suno di evene' di goloso i-ngidaa', monovo laminekumu' ngumo helamivo minaa', 4 engi' zuho biluvaliti a'ningu' ngele'mizi milaa', inite' bubu izi di goloso iga', engikumu' gilavo dizaa', ido' O'mosolo' lu'ine milaa' nani' nene ivile' ivosa oko'ine'mo lanite' gelaa' neine' initeto' lu'ine milaa', 5 nevo'mine mana'mine monovo nene mo ha di soto' ilisave. Ido' mono' nene vi gilaa' ilizaha oko'ine losuvolotikovo' gili mini mono' nene lu'ningu' amuzo molo gihile've do soto' ilingumu' nene o've li monoli'mi amuzo nene vasa izilisave. Nemu' nene gaza a'mine ne'mine mana'mine vesi nene bizami olovo' ogo minezo. 6 Ne'mine luvoni' nene nemu' luve: Engikuti' nene ve malite evene' go'ine izi numu'ningu' dizi a'mingu' vene' monoku' lu'ine gilizevo o vivo mini oko'nido' lihime monovo vai' dizivo oko'ine'mo lanite' giline' inite' ato ato' ne'mo ngimimise' ogo do novivo minaa' ani' vene' nene lu'ningu' hizi di gi'mizaa' nave. 7 A'ne'mine vene' nene gamazi lamineli'mi monovo nene gelelone li gamene gamene amuzo milaa' nani'za gamazi gihile nene ngeli ma ningi gililizado' minisa'mave. 8 Ido' Halao' luso ve've seta' Zaneki Zabeleki ingine Mose' gamazi've di'mi limilisa asidi'mine igi noluve ingine mene gamazi gihile di'mi limilisa iga' nave. Ingine nene lu'ine ga'ine unuvo ogo goloso o vine' neivo mini ingine O'moso'mo gilivo lisihe' amine' monokumukovo' gili ele'vole' iga' nave. 9 Ne'mine iga' naha Zaneki Zabeleki monovo'ine soto' ine' ne'mino a'mine luve nesi negi hizani' monovo'ine nene soto' ogavo evene' muki' nene ningi gililisanako a'mine evene' go'ine izaa' ani' nene gohi go'ine izi'mi vilizado' minamilisave.

Timoteo' Nene Mono' Monovo Apize Imunido' E'mete Lamine' Ilive Losa Paulo' Gala Dani' Gamazi

10 Ne neiha gei' neve nene neni' mono' apize ngemaa' ogo ogo molo oga' uvoni' monovo'nesi ido' gono do gihile do soto' olosa giluvongumu' nesi nene mo ningo gele'mo gele'mo nane. Ido' Kilisito'nimu' gele ele'vole' o mino hongu lo mino lu'ne ngemaa' ogo mino mulumo geni ha gehe'mo vo minaa' nouvongumu' nesi nene mo ningo gele'mo gele'mo ogo nane. 11 Ido' evene' goboni mala' mala' i-nidi nizavo ne'mi mulumo geni naba Adiokia numuno ebekukisi Ikonio numuno ebekukisi Lisitila numuno ebekukisi gehe'mo vuvoni' monovo nene gasika mo gele nane. Ee, ido' a'mine geni inite' mukiliti lulou' minuvodoti' nene Guvelesi ve'mo alete molo-nedavo lukuvo nosa nouve. 12 Ido' evene' laza Izesu Kilisitoda gi'mizo mino mono' monovolo' e'metovo' minelone losa ne'mine ogo minelonive muki' nene goboni mili-lidavo a'mine ne'mine geni mulumo inite' nene gehamolonivoba mo gehelone' o neive. 13 Ne neiha evene' goloso soza mono' li evene' go'ine izaa' ave nene Satani'mo go'ine izavosa ingine a'mine'mine igi evene' go'ine izi'mi vi mini goloso naba i'mi i'mi vi minilisave. 14 Ne'mine igi minilisaha gei' neve nene a'mine gele nane' mono' apize gimunive lei' monovote nene mo ningo gele nane' nenako nemu' a'mine gei' gele mino gele mu'musi' o nane' mono' malo' nene do ngi lo do minezo. 15 Ido' ma mesi nene gele nane' ma neive. Ado' gomu' izipe ngomoloti' mono' godolouti' gamazi gele'mo gele'mo ogosa do madungau' molo osu' lo nane. Ido' a'mine mono' godolouti' gamazi ne'mo nene lukuvo nalinido' gele'mize molalido' o neive. Ee, a'mine gamazi do madungau' molanidi'mo gaza gamazi monovo gele vevesosa Izesu Kilisito'nimu' gele ele'vole' ilinido' o neine' nenako ne'mo nene O'moso'mo do gu' izelido' gele'mize molaloseive. 16 Mono' godolouti' gamazi muki' nene O'moso'mo evene' madu'ningu' molo zatuho' o-ngedavo gizani' neine' nenako nemu' a'mine gamazi neve nene mono' monovo apize ngemelonidokisi ido' gopo ladani iga' avesi lihime davesi monovo'ine ngelebizo do lisihe' o-ngedo ngele'mize akalo' olonidokisi ido' monovo lisihekovo' igi mili ilizani' monovo api' napi' o-ngemelonido' nesi nene lisihe' lamine' o neive. 17 Ne'mine olonido' lisihe' o neine' nene O'moso'mi gelekele' ve laza nene do lisihe' gehepeve oko mino gono lamine' ato ato' muki' nene dalonido' mo lisihekovo' o mineloningumu' ve losa ne'minosa neine' neive.